پڑوسی نامہ - Sulaiman Khateeb

کیا خوب پڑوسی ہے پڑوسی بھی ہمارا صورت سے نظر آتا ہے منحوس بیچارا

دیوار کے اُس پار ہے صدقے کا اُتارا ہر روز نکلتا ہے یہ دُمدار ستارا

منھ صبح نظر آئے تو کھانا نہیں مِلتا اِنسان بھٹکتا ہے ٹھکانا نہیں مِلتا

تقریب میں جانا ہو تو زیور مرے گھر کا سرکار چلے دورے پہ بستر مرے گھر کا

ورزش کا بڑا شوق ہے مگدر مرے گھر کا مر جانے کو جی چاہے تو خنجر مرے گھر کا

اُس پر یہ حماقت کہ اکڑ جاتا ہے مرغا پر مار کے لڑنے پہ اُتر آتا ہے مرغا

وہ شورِ قیامت ہے کہ اللہ بچائے مر کر ہی کوئی آنکھ لگائے، تو لگائے

یوں خیر سے جو میرؔ کی شامَت کبھو آوے امّاں کبھو ناچے ہے تو باوا کبھو گاوے

اِس غولِ بَیابانی میں کیا کیا نہیں ہوتا اُلّو کا یہ پٹھا ہے کہ شب بھر نہیں سوتا

ہانڈی میں ہے سالن نہ چنگیری میں ہے روٹی اس چِیل کی نظروں سے بچی تن پہ نہ بوٹی

کیا عرض کروں آپ سے اِک بات ہے چھوٹی یہ ننگا منگاتا ہے مِرے گھر سے لنگوٹی

اور خود کو بتاتا ہے سلاطین سلف سے اور سید سادات ہے جورُو کی طرف سے

چوروں کی طرح رات میں کمپونڈ کو توڑے دس بارہ کبھی بھینس مِرے باغ میں چھوڑے

سنڈاس کا پانی کبھی گھر میں مرے موڑے وہ زورِ ذلالت کہ شرافت کو جھنجھوڑے

خونخوار درِندہ ہے اِسے مار کے پھینکو صدقے کا بھلاواں ہے ذرا وار کے پھینکو

گھلتا ہے بِچارا کہ مجھے کام نہیں ہے ہر راز مرا راز ہے کیوں عام نہیں ہے

بچی کو مرے کس لئے پیغام نہیں ہے ہمسایہ مرا کس لئے بدنام نہیں ہے

راتوں میں مرے دیر سے آنے کا تردُّد بیوی جو کہیں جائے تو جانے کا تردُّد

دُنیا میں کسی سے بھی محبت نہیں اس کو وہ کون ہے جس سے کہ عداوت نہیں اس کو

کس لت کی بھلا خیر سے رغبت نہیں اس کو کس چیز کی ہر وقت ضرورت نہیں اس کو

کہنے کی نہیں بات پڑوسن کی ضرورت شوہر کو کبھی پٹینے بیلن کی ضرورت

مرغی کبھی مر جائے تو ہم پر ہی شبہ ہے بچہ کوئی ڈَر جائے تو ہم پر ہی شبہ ہے

چھو چھا کوئی کر جائے تو ہم پر ہی شبہ ہے صدقہ کوئی دھر جائے تو ہم پر ہی شبہ ہے

بانکا جو گذر جائے کبھی راہِ گذر سے بیوی کو بھی دیکھا کئے مشکوک نظر سے

ہمسایہ کے لونڈے ہیں کہ چوروں کے نمونے بچوں کے اُڑا لیتے ہیں چپکے سے کھلونے

سمجھا کے ذرا پوچھو تو لگ جاتے ہیں رونے ماں باپ چلے آتے ہیں اُلٹا ہمیں دھونے

لڑنے پہ اُتر آئیں تو سب ہیچ اَکھاڑے زندوں کو سبھی گاڑ کے مردوں کو اُکھاڑے

اُٹھو مِری دُنیا کے شریفو اِدھر آؤ مردودِ زمانہ سے مجھے آکے بچاؤ

اِبلیس کے فِتنے کو ذرا آکے مٹاؤ یا چار کے کندھوں پہ مرا لاشہ اُٹھاؤ

اِنجیل بتاؤ اِسے قرآن بتاؤ محبوبِ خدا کا اُسے فرمان بتاؤ

کیا شان ہے ہمسایہ کی وہ شان بتاؤ اِنسان ہے کیا چیز کہ اِنسان بتاؤ

یہ تو جو سمجھتا ہے کدورت ہی رہیگی اِنسان سے اِنسان کو نفرت ہی رہیگی

یہ بھول ہے تیری کہ حقارت ہی رہیگی یہ وقت کا فرماں ہے اُخوت ہی رہیگی

دُنیا ہے محبت سے محبت ہی رہیگی

ہم قول کے پابند ہیں لا ہاتھ ملالے بچھڑے ہوئے بھائی ہیں کلیجے سے لگالے